Kalaallit dokumentariliaannut 10,3mio.kr.

Kalaallit Nunaanni Filminstituttip nuannaarutigalugu nalunaarutigisinnaavaa, Kalaallit Nunaanni dokumentarfilmit pillugit filmiliortitsinissamut maanna 10 millioner koruuninik tapiissuteqartoqassasoq.

Aningaasat kalaallit filmiliortartunut oqaluttuanik inuiaqatigiinnut, kultuuritsinnut siunissamullu pingaaruteqartunik – kalaallisut nipigineqartunik – dokumentarfilminik amerlanerusunik ineriartortitsinissamut piviusunngortitsinissamullu oqaluttuarisaanermi periarfissaqartitsipput.

“Kalaallit Nunaanni dokumentarfilmiliortarnerup nukittorsarnissaanut, filmiliortartunut amerlanerusunut inuiaqatigiinnut, kultuuritsinnut siunissamullu pingaaruteqartunik oqaluttualiornissamut periarfissiisumik – kalaallisut nammineq nipitsinnik oqaluttualiornissamut – tamanna oqaluttuarisaanermi periarfissaavoq. Kalaallit Nunaanniit oqaluttuat amerlanerit qaffassarnissaannut ersarissarnissaannullu maanna periarfissaqalernerput pingaaruteqarpoq,”

Kalaallit Nunaanni Filminstituttimi siulittaasoq Malik Kleist oqarpoq.

Aningaasaliinerup agguaanneqarnera Kalaallit Nunaanni filmiliortarnerup nukittunerusumik attanneqarsinnaanerusumillu ineriartortinneqarnissaanut pingaarutilimmik alloriarneruvoq. Aamma Kalaallit Nunaanni Filminstituttip neriuutigaa tapiissutit kalaallit filmiliornerannut annertunerusumik siunissamilu sivisuumik aningaasaliinissamut aallaqqaasiutaassasut.

“Periarfissamut matumunnga annertuumik qujamasuppugut, peqatigisaanillu neriuutigaarput tamanna kalaallit filmiliornerannut annertunerusumik siunissamilu sivisuumik aningaasaliinissamut aallaqqaasiutaassasoq. Aamma kissaatigaarput siunissami kalaallit spillefilmiinut ineriartortitsinissamut aamma piviusunngortitsinissamut tapiissuteqarnissamut aningaasat nassaarineqarsinnaassasut, taamaalilluta filmiliortarneq tamakkerlugu nukittorsarsinnaaniassagatsigu.” Malik Kleist naggasiivoq.

10 millioner koruunit tassaapput aningaasat Danmarkimi aningaasanut inatsisikkut Kalaallit Nunaannut nuunneqarsimasut. Aningaasat tiguneqarmata Kalaallit Nunaanni Filminstitutti aaqqissuussinermut sinaakkutissanik pilersitsinissamut siunnerfilimmik sulisimavoq, ilaatigut malittarisassanik suliaqarneq, nittartakkap naammassillugu piareersarnera kiisalu qinnuteqarnissamut nutaamik atortulersuutinik ineriartortitsineq.

“Suliassaq pingaarneq tassaavoq aningaasat Danmarkimiit tigunissaat, malittarisassanik suliaqarneq, nittartakkap naammassillugu piareersarnera minnerunngitsumillu qinnuteqarnissamut atortulersuutaa sapinngisamik sukkasuumik ineriartortillugu. Kalaallit Nunaanni dokumentarfilmiliortut amerlasuut aningaasat taakku qinnuteqarfigineqarsinnaalernissaat utaqqisimavaat. Maanna kiisami qinnuteqarnissamut ammaassisinnaalerpugut,”

Filminstituttimi pisortaq, Inunnguaq Petrussen, oqarpoq.

Aningaasat nutaat aqqutigalugit kalaallit dokumentarfilmiliortartut producenterillu periarfissanik amerlanerusunik maanna atuisinnaalissapput. Siunertaavoq filmiliornermi ineriartortitsinermut piviusunngortitsinermullu atugassarititaasut pitsaanerulersinneqarnissaat, sumiiffinni piginnaasallit nukittorsarnissaat kiisalu kalaallit oqaluttuaasa amerlanerusut Kalaallit Nunaanni nunanilu allani isiginnaartartunut apuussinnaanissaat qulakkeerneqassasoq.

Filmiliorsinnaanissamut qinnuteqarnissamut periarfissaq alla aamma qanittukkut saqqummiunneqassaaq, nalunaarutit pisariaqartut atuutilereerpata.

Tapiissutinut qinnuteqarnissamut piffissaq: 24. august 2026 – 24. september 2026.